Салата „Длаборез“

09.09.2024 • Ентериер и мебел

Во Македонија е вистинска реткост да пронајдете сочуван ентериер од минатите епохи и стилови. Што од негрижа, немање државна стратегија за културното наследство, дотаму и до изгубеното чувство за фамилијарните традиции, куќи и богатство. Со скопскиот земјотрес особено исчезнува цел еден свет на архитектура и ентериери, мебел и декорации.

Уште поголема реткост е да најдете оригинален ентериер особено со отмени карактеристики, како што е салата „Длаборез“ – најрепрезентативната просторија во Собранието на Македонија.

Салата „ Длаборез“ претставува дел од работните простории на претседателот на Собранието, која се користи за официјални средби со претседатели, премиери и други државни функционери.

Собата е декорирана со длаборез во 1938 година. Ентериерот е проектиран во периодот од 1935 година до 1937 година од уметникот Драгутин Медењак Инкиостри (1866-1944), а резбата е изведена од Глиша Костов, столар и резбар од Тетово, со неговата тајфа.

Ѕидовите се обложени со дрво, поделени во полиња, со различни геометриски, вегетабилни и зооморфни мотиви, вклучувајќи елементи од народната уметност и традиција.