МАРХ

„Грешки во чекори“ – новите автобуски постојки на ЈСП

05.12.2016 • Став Урбана опрема

Изминативе години, Јавното сообраќајно претпријатие започна со заменување на старите автобуски постојки низ Скопје.  Интервенцијата е за поздрав бидејќи градот поседуваше недоволен број  автобуски постојки или поседуваше остатоци од нив.

Како нова содржина се појавија електронските табли кои се засебна урбана опрема, но новите автобуски постојки не понудиja  повеќе од оние кои беа поставени пред повеќе од 10 години – дизајнерското обликување е  поедноставена „линија“ на старото решение, додека  содржината е недоволна за современите текови.

@build.mk

Скопје пропушта можност за навистина сублимирано и репрезентативно решение за постојките бар во централниот дел на градот, кои требаше да апсорбираат повеќе технолошки можности на современите потреби. Освен заштитата од временските непогоди, која е основна и најпримарна функција, клупата за седење и корпата за отпадок, не можеме да забележиме дипслеј – маркетинг, дополнителни информации за градот и околината, детален распоредник за повеќе линии, машина за билети, мапи, илуминација, податоци и броеви за контакт, поплаки и информации на ЈСП, туристички информации и податоци на англиски јазик итн.

Со дизајнот на постојките и не вклучувањето на овие сегменти доведе до типични проблеми со нивното додавање. Се случува  ситуација на неединство на елементите кои треба да функционираат лесно за корисниците, како резултат на не планирање и правилна стратегија на развој.

Во нашата ситуација можеме да забележиме дека :

-електронската табла која е независен објект од урбаната опрема е визуелно изолиран од оние кои чекаат во случај на временски неприлики;

-истата е поставена во правец на движење наместо на пресретнување на автобусите кои пристигнуваат;

-клупата која служи за одмор е изработена во метал, што значи во екстремните летни температури е вжештена, додека во зимските ладна;

-мапата е со недоволно податоци, несоодветно заштитена, негде не постои или е веќе оштетена;

итн.

Атобуските постојки покрај за они кои чекаат, треба да понудат информации и за оние кои пристигнуваат или поминуваат.  Тоа значи дека патникот треба да е способен да го забележи името на постојката без никаков проблем од било која позиција од автобусот.

Со издавањето на маркетиншкиот простор апсолутно не остана површина која не е покриена од објектот со што самиот веќе е преоптоварен,  видливоста на испишаното име на постојката е блокирано, не останува простор за надополна на содржини.

Ваквиот начин на делување е резултат на несоодветно планирање и развоен план кога елементите се поставуваат во интервали. Истиот принцип градот го применува и при асфалтирањето на улиците, кои често откако е поставен новиот асфалт се раскопуваат за нови иснталации а потоа не се соодветно реконструирани. Едноставно се работи за грешка во чекори.

Забележливо е раздвижувањето кон подобро кога би компарирале со она што го имавме до скоро, меѓутоа реализирањето е задоцнето и сиромашно во време кога Скопје за јавен транспорт  го има автобусот како единствена понуда.

Светлина во овие процеси е неодамнешниот повик за дизајн на паметна автобуска постојка за централната скопска станица „Рекорд“, чие победничко решение го очекуваме за објава.

Ф.К