Зграда на МРТВ / 1984

Година: 1971 - 1974

Година на изведба: завршена во 1984 год.

Автори: Идејно решение на Кирил Ацевски, Кирил Петровски и Крсто Ристовски; Основен проект на Кирил Ацевски, Нако Манов и Харалампие Јосифовски - проектантското биро на „Бетон“

Фотографии: насловно фото: wikimapia.org

Извори: wikipedia.mk; reporter.mk;

Локација: центар на Скопје

Зградата на Македонската радио телевизија, која се наоѓа близу брегот на реката Вардар, е едно од главните обележја на Скопје од почетокот на 80-те години. Оваа градба важеше за една од најубавите во поранешна Југославија. Зградата на 24 ката е висока 90 метри и претставува маркантно архитектонско здание. Неколку студија се изградени под земја, околу три метри под нивото на Варда, што ја прави оваа градба уникатна. Проектирана е три години, а за нејзината изградба биле потребни осум години.

Зградата на МРТВ и денес е една од највисоките градби во градот. Идејните и архитектонски решенија за оваа зграда се правени уште во 70-те години, а врз основа на технологијата што постоела во тоа време.

 

Историска фотографија, поглед кон кејот и зградата на МРТВ, © retroskopje

 

Потребата да се изгради нов објект на националната телевизија се појавила по катастрофалниот земјотрес во 1963 година, во кој се урнал и тогашниот објект на Радио Скопје. Во тоа време сите екипи се преселиле и емитувале програма од шатори и од бараки во Нерези.

 

Скопје пред изградба на зградата на МРТВ, © retroskopje
Скопје пред изградба на зградата на МРТВ

 

Кога се правел новиот план за изградба и модернизација на градот, телевизијата добила одлична локација на објектот. Формирана е експертска група, составена од инженерите Кирил Ацевски, Кирил Петровски и Крсто Ристовски, кои го изработиле идејниот проект за зградата. Тие се консултирале во неколку големи европски ТВ-куќи и од сите добиле позитивно мислење за изгледот на новиот објект. Врз основа на тој концепт, проектантското биро на „Бетон“ го изработи главниот проект. Одговорни проектанти биле Кирил Ацевски, Нако Манов и Харалампие Јосифовски.

Проектирањето траело од 1971 до 1974 година, а откако било завршено, почнала изградбата на тогаш највисоката зграда во Скопје, но и највисока телевизика куќа на Балканот.

 

Зградата на МРТВ во тек на изградба, © skopjeinfo.mk

 

Оваа градба претставува современ објект со висечки фасади од стакло, мермер и алуминиум. Граден е според сите технички стандарди и прописи. Откако се изградила армирано-бетонската конструкција, врз неа се извршил тест за издржливот на земјотреси.

 

Сателитска фотографија од центарот на Скопје, © retroskopje
Поглед кон МОБ и МРТВ, © retroskopje

 

Целиот објект е составен од четири блока: музички и радиостудија, драмски и телевизиски студија и кулата од 90 метри како административен објект. Во зградата има и 14 други студија. Телевизиските студија се со површина од 400 квадратни метри, а околу нив има повеќе помошни простории: шминкерници, гардерови, простории за одмор, монтажа, режија и слично. Во едно од музичките студија можат да се сместат оркестар и хор, составени од 120 луѓе и 50 луѓе публика. Два ката од објектот се проектирани за кинотека.

 

 

 

Музичките студија во МРТВ се градени 11 метри под земја и достигаат три метри под нивото на Вардар. Имаат по три пода и по три ѕида и големи акустични врати, тешки по четири тона, колку што тежат и светлата.

 

 

Веќе неколку години долем дел од просторот на МРТВ се користи и за други намени, како канцеларии и простории за државни институции кои не се на никој начин поврзани со телевизија. Ентериерот и екстериерот се застарени, а на зградата и е потребно и надворешно и внатрешно реновирање.

Повеќе фотографии >>>