МАРХ

Реновирање на куќа од 60тите во Скопје / Тим автори 2014

14.10.2015 • XXI век

Локација: општина Чаир, Скопје

Автори: Бетим Зеќири, Бекир Адеми, Амине Адеми

Конструкција: Денис ……, Миле Партиков

Година: 2014

Изведба: Ќамис-инг, Скопје

Фотографии: Андријана Тилиќ

Извор: авторите

Објектот е позициониран во општина Чаир, помеѓу старата скопска чаршија и скопската тврдина.

Една од четирите куќи во низа кои се наоѓаат во интензивен урбан контекст.  Објектот е изграден во 60-тите години на минатиот век, со скромен и јасен модернистички изглед. Меѓувремено истиот бил напуштен  и  единствената можност за повторна употреба на објектот е да се  прилагоди на потребите на инвеститорот преку процес на реновирање.

Четирите куќи биле изградени сите наеднаш, со заеднички конструктивен систем, и било каква интервенција беше исклучително комплицирана од аспект на структуралната и просторна организација.

Со внимателно избрани методи, стана возможно да се реанимира објектот, без нанесување на  штета на соседните објекти. Структурната логика е сочувана иако се направени статички засилувања на носечките елементи како главните столбови, ѕидови и сите меѓукатни плочи.

Дополнително, додадена е челична конструкција за да ја поткрепи екстензијата на задната страна на куќата и на покривот.

Сите отвори беа ревидирани и додадени нови, со цел да донесат уште повеќе количество на дневна светлина во просторот. Визбата, кој се користела само за складирање, сега располага со голема дневна соба и трпезарија со кујна која завршува во директен контакт со задниот двор.

Новата главна спална соба е додадена на самиот покрив со пристап до две големи тераси кои нудат панорамски визури кон старата чаршија и градскиот пејзаж на Скопје.

За обработка на внатрешните простори користени се конвенционални материјали, аналогни на претходно вградените. Дел од новододадената конструкција е видлива и во внатрешноста со што скромната естетика се надополнува со искреност на архитектонскиот израз.

Бидејќи интервенцијата беше обилна и доминантна, додаден е нов слој на фасадата. Со тоа се создава ново ниво на интерпретација,поголема контрола на микро-климата на објектот и во исто време е видлива претходната архитектонска синтакса.

Рустичноста на фасадата, покрај естетската интерпретација, овозможува и директна поврзаност со историските градителски образци присутни во непосреднаблизина(Стара Скопска Чаршија).

Овој пристап претставува можен рецепт за ревитализација на богатото модернистичко архитектонско наследство на Скопје.