Црква Св. Никола Чудотворец / Охрид, XI-XIV век

06.12.2024 • VI-XV век

Период: XI-XIV век.

Локација: стар дел на Охрид, близу до Заводот за заштита на спомениците и до црквата св. Богородица Челничка.

Извори: www.zkn.mk;

Фотографии: МАРХ

Ви претставуваме уште една минијатурна црква, скриена меѓу сокаците на стариот дел на Охрид. За овој мал и скромен храм постојат ограничени историски податоци и анализи. Но, она што го привлече нашето внимание е неговата урбанистичка функција: како оаза на зеленило, простор за одмор и место од кое се отвора прекрасен поглед кон охридскиот пејзаж и езерото.

Св. Никола Чудотворец е византиска црква изградена врз остатоците од постар ранохристијански храм. Најстарите фрески околу олтарот овозможуваат датирање на црквата во периодот меѓу XI и XII век, додека фреската на западниот ѕид припаѓа на подоцнежен период, помеѓу XII и XIV век.

Станува збор за еднокорабна градба со нартекс и олтарна апсида. Структурата е делумно вкопана во стрмниот терен, што се забележува преку различните висини на јужната и северната фасада.

И покрај нејзината скромност, црквата содржи неколку декоративни елементи од камен, кои денес се изложени низ дворот.

Дворот на црквата е одлично одржуван, со поставени клупи за одмор. Посебна атракција е летниковецот, кој е вешто позициониран како видиковец и претставува место за собирање на дел од локалното население.

Ова место е пример за тоа како внимателното уредување на околината може да претвори едно наизглед скромно културно наследство во активна урбана точка, истовремено оддавајќи му почит на споменикот и оживувајќи ја историската локација.