МАРХ

Мишел Ројкинд во Скопје „Доколку проектот не враќа површина, време или достоинство – нема да се гради“

16.09.2025 • Информации

Извори: mia.mk / nezavisen.mk / instagram.com/rojkind

Овие денови на социјалните мрежи се споделува визијата на реномираниот мексикански архитект Мишел Ројкинд за населбата Чаир – една од најгусто населените и културно најбогати општини во Скопје. Тој е дел од изборниот тим на кандидатот за градоначалник Бујар Османи. Архитектот Ројкинд сепак изјавува дека неговиот ангажман е целосно самоволен и воден од верба во потенцијалот на Чаир, а не од политички интерес.

На 13 септември 2025 година тој ја претстави иницијативата „Чаир 2040: Заедничка визија за заедничка иднина“, замислена како манифест што се претвора во патоказ за урбана обнова со човекот во фокус.

„Чаир е предизвик во секоја смисла, и токму тоа го прави привлечен,“ вели Ројкинд во интервју за mia.mk, посочувајќи ја густината, слоевитата историја, мултикултурниот состав и живата социјална динамика. Според него, големата концентрација на жители не е проблем, туку „мотор за креативност“ – доколку се создадат вистински услови. Намерата му е пренатрупаноста да се претвори во удобност преку пешачки улици, засенчени јавни простори и еколошки решенија со градини, собирање дождовница и дрвореди.

Со седиште во Мексико Сити и богато меѓународно искуство, Ројкинд гледа на архитектурата како катализатор за социјална, културна и еколошка регенерација. Тој смета дека трансформацијата на Чаир мора да надмине градби и да стави акцент врз безбедност, социјална кохезија, домување, климатска отпорност и економска инклузија. Меѓу неговите предлози се добро осветлени улици, програми што ги поврзуваат културите и генерациите, поддршка за мали бизниси и мобилност која ги става пешаците и велосипедистите пред возилата.

Клучен принцип е транспарентност и учество. Тимот веќе одржува средби со жители, трговци и верски заедници за да се обезбеди дизајн кој произлегува од локалните потреби. Јавна презентација на визијата е закажана за септември, со пилот-проекти и долгорочни механизми за управување.

Ројкинд го поздравува вклучувањето на други меѓународни архитекти, гледајќи во „плуралното знаење“ голема предност. „Авторството му припаѓа на заедништвото,“ истакнува тој, нагласувајќи дека успехот се мери преку секојдневни подобрувања – побезбедни улици, посилна економија и културна живост – а не преку политички поени. Првите разговори со неговиот тим, заедно со Uno Architects и Son Architects, се фокусирале на луѓето – пешаците, бремените жени, родителите со колички – и на достоинството во јавниот простор.

За Ројкинд, Чаир е дел од поширока мисија: создавање иднини кои се инклузивни, отпорни и засновани врз заедничко управување. Тој заклучува: „Ако не враќа земја, време или достоинство на луѓето – тоа не се гради.“ Целта е едноставна: повеќе живот по квадратен метар и заемност во секоја одлука.