Комплекс станбени кули кај ”Млечен”

05.10.2026 • Фотографија ХХ век / II половина

Објект: Градски комплекс на станбени кули ( познат како Млечен)

Автори: Олга Папеш, Лилјана Ристевска

Година на проектирање: 1980

Година на изведба: 1982-1988

Изведувач: ООЗТ/ градилиште на РГО „Бетон”– Скопје

Локација: помеѓу ул. ”Анкарска” и ул.”Атинска”,

покрај бул. ”Митрополит Теодосиј Гологанов”, Општина Карпош, Скопје

Фотографија: Борис Јурмовски, 2026

Сместено помеѓу стара „Алумина“ и стара „Треска“, платото кај „Млечен“ претставува мало, препознатливо урбано јадро — плоштад-плато опкружено со комплекс од четири станбени кули.

Комплексот е составен од згради со различна катност — П+9+поткровје и П+7+поткровје, поставени така што го дефинираат централниот јавен простор и создаваат спој помеѓу станбениот и јавниот живот на платото.

Интересно е и решението на гаражирањето и двонаменското засолниште, кои се организирани подземно, под средишниот дел на комплексот. Над нив, просторот продолжува како пешачко плато — со клупи и зеленило, замислено како заеднички простор за жителите.

Во приземните нивоа се сместени простории со трговска и услужна намена, додека останатите катови се организирани како станбена зона. Така, приземјето го активира просторот кон платото, а станбените единици се повлекуваат во вертикала.