Винарска визба во Бардовци / студентски проект на Ристовски и Цоневска

05.02.2016 • Студентски проекти

Проект: Винарска визба
Локација: населба Бардовци, општина Карпош
Студенти/автори: Иван Ристовски и Тијана Цоневска
Педагошки тим: Доц.д-р. Александар Радевски, Асс м-р. Горан Мицковски, Доц.д-р. Димитар Папастеревски, дем. Виолета Ѓорѓевска, дем. Марио Баткоски
Годинa: 2015/2016

Образложение:
Предмет на задачата по предметот “Архитектонско студио” на Факултетот за Архитектура во Скопје беше да се проектира винарска визба со капацитет од 2.000.000 литри/годишно (црвено и бело вино). Објектот е инспириран од внатрешната стуктура на едно зрно грозд.

Пристапот до винарската визба е овозможен преку пристапна индустриска улица со која се пристигнува во влезната партија со контрола (портирница). Во рамките на парцелата е предвидено кружно движење и паркирањето се врши во рамки на самата парцела. Кружната геометрија на објектот е добиена на пресекот на дијагоналите на локацијата, со што може да се долови амбиентот на целото производство на вино, кое започнува од прием на грозје, ферментација, барик со дегустација на вино, флашара и магацин.

Проектните содржини кои се наменети во објектот се: влезна партија со контрола (портирница) каде може да се мери донесената количина на грозје како и станица за мерење на квалитетот на грозјето и паркинг за вработени. Управата и администрација за потребите на комплексот е сместен во посебен влез. Работен простор за преработка на грозјето преку прием, преработка на бело и црвено вино, простор за ферментација на бело и црвено вино, простор за одлежување на вино, флаширање и магацин за амбалажа. Просторот за дегустација на вино е сместен во просторот за одлежување на виното.

Во самиот комплекс е сместено угостителство и туризам за потребите на винарската визба. Предвидени се и сместувачки капацитети за вински туризам кој опфаќа сместување на посетители, ресторан и продавница.

Надворешниот дел на објектот има современа двојна фасада во вид на “Smog-Eating Facades”. Кога сончевата светлина допира до хемиски третираната површина, започнува процес на оксидирање на органска материја, при што загадувањето го трансформира во водена пареа и CO2. Оваа одржлива фасада е од витално значење за околина со винови насади. Во внатрешните ѕидови (делот кој всушност е издлабен од самиот круг) се поставени вертикални градини кои всушност претставуваат живи ѕидови на кои се поставени инсталации за наводнување.