МАРХ

Деловна зграда ЗОИЛ „Македонија“, Скопје / 1978

16.06.2025 • ХХ век / II половина

Деловната зграда на Заедницата за осигурување имоти и лица „Македонија“ е проектирана и градена во време кога целосно дојдоа до израз настојувањата на македонските творци да создаваат архитектура со повисоки естетско-технички стандарди.

Една од таквите реализации е и овој деловен објект чија местоположба овозможи да се искажат креативните дострели на проектантскиот тандем Муратовски – Сидовски.

Внатрешната организација е едноставна, со јасно издвоени просторно-функционални целости. Канцелариските трактови по катовите во основата се издвоени во два блока меѓусебно поврзани со интерен хол и со вертикалните комуникации.

Успешноста во функционалниот распоред е пренесена и во анексот наменет за корисниците на услугите каде што доминира големата шалтер сала и централниот влезен хол.

Забележливата фасадна обвивка се одликува со строги геометриски форми, дадени со професионална селективна сериозност. Двата по висина нееднакви корпуси и анексот имаат чисти фасадни површини со нагласена вертикалност, компонирани со темни стаклени ленти и површини врамени во темен алуминиумски метал.

Архитектонската слика е надополнета со мрежа од жолтеникави травертински плочи со кои се обложени полните површини и со што е добиен достоинствен изглед на објектот.

Вкупниот впечаток е дека со овој објект македонската архитектура се здоби со една нова современа ознака, а соседните објекти достојни придружници.

Македонија Осигурување, Скопје /фотогалерија/

Насловна фотографија: Борис Јурмовски, 2023