МАРХ

ДЕН НА КОМОРАТА – со доделување на 4 годишни награди за 2023 година

24.12.2023 • Информации

На 22 декември 2023 година на пригодна свеченост по повод 16 годишнината од своето постоење се одбележа Денот на Комората и притоа се доделија по 10ти јубиларен пат четирите годишни награди во знак на благодарност и почит за творештвото на своите членови – архитекти и инженери.
Комората претставува институција со јавни овластувања која што го обединува сиот индивидуален инженерски капацитет во државата вклучен во една од најмоќните индустрии – градежништвото.

Свеченоста ја отвори Претседателката на Комората г-ѓа Кристинка Чулак. Во своето обраќање таа кажа: „И оваа година со гордост можеме да констатираме дека денес славиме постоење на една стабилна, унитарна, моќна и напредна Комора која од почетокот на оформувањето во континуитет го има инженерот во својот фокус. Секојдневните предизвици на нашето општествено опкружување огледално се пресликани во функционирањето на сложениот организациски систем на Комората составен од 12 професионални одделенија. И воопшто не е лесно, но задоволството е огромно, затоа што резултатите се евидентни.“

Во продолжение се осврна на големите исчекори кои ги има постигнато Комората, како што се:
– заживувањето на толку долго очекуваниот документ што ги нормира вредноста на инженерски труд во високоградбата и прогесирањето на ценовникот на нискоградба и геотехника благодарение на соработката со Министерството за транспорт и врски и Министерот Благој Бочварски.
– процесот на преземање на бројни активности за воведувањето на БИМ – иднината на градежната индустрија.
– подобрување и усогласување на легислативата со активно доставување на забелешки до надлежното Министерство
– преземање на главната улога во процесот на доквалификација на членството, преку организирање на интензивни обуки за примена на Еврокодовите
– системска децентрализација преку одржување на 15тина обуки, средби и состаноци надвор од Скопје.
– промоција на струките на локално и меѓународно ниво како што се „Деновите на електротехника“ и „2 годишна средба на архитекти и планери во Битола“.- продолжување со подршката на младите инженерски генерации.

На крај Претседателка Чулак го истакна рекордниот број на активни инженери во Комората – 3700, и изрази благодарност до сите присутни колеги и соработници, без кои Комората немаше да биде тоа што е.
Присутните имаа особена чест и задоволство пред нив да се обрати лично Претседателот на Република Северна Македонија, г-динот Стево Пендаровски, почесен и високо ценет гостин на Комората, покровител на наградата Инженерски прстен.

Претседателот на државата во своето обраќање кажа: „Инженерството има решенија за превенирање на климатските промени, без него човекот би бил апсолутно мал, немоќен и безначаен пред силите на природата. Во денешнинава полна со неизвесности и закани од секаков вид, инженерството има клучна улога во изнаоѓање на механизми за одржување на еко системот од кој сме дел. Обврска пред сѐ на сите архитекти и инженери да ја стават својата професија во служба на безбедноста и здравјето на луѓето, заштита на животната средина, но и создавање на подобри услови за живеење.“ Во продолжение ја истакна улогата на Комората заедно со Инженерската институцуја на Македонија (ИМИ), во доделување на инженерскиот прстен на младите инженери, чијшто покровител е токму институцијата Претседател на државата. На крај се обрати на архитектите и инженерите од Комората – да останат посветени на својата професија, која е креатор на човековото опкружување и присутна во нашето секојдневие и да продолжат да придонесуваат за прогресот на нашата држава.

Притоа, Претседателката Кристинка Чулак додели Благодарница за континуирана подршка на Комората на Претседателот Стево Пендаровски.
Во продолжение Раководителите на професионалните одделенија: Веселинка Герасимова Петровска д.и.а, Михаел Димитровски д.и.а, Проф. д-р Мери Цветковска д.г.и, Владе Гроздановски д.е.и и Проф. д-р Даме Димитровски д.м.и. со соодветни најави ги соопштија имињата на овогодинешните добитници:

Одделенија на Архитекти и Урбанисти – Награда именувана Проф. Борис Чипан
• Добитник на наградата за 2023 година е Планерскиот тим на АПП под раководство на
м-р АНДРИЈАНА АНДРЕЕВА д.и.а.
Одделение на градежни инженери – Награда именувана Проф. д-р Александар Цане Ангелов
• Добитник на наградата за 2023 година е БЛАГОЈА ДИМИТРИЕСКИ д.г.и.
Одделение на инженери по електротехника – Награда именувана Проф. д-р Станимир Јовановски
• Добитник на наградата за 2023 година е КИРИЛ КУЈУНЏИЕВ д.е.и.
Одделение на машински инженери – Награда именувана Проф. д-р Илија Черепналковски
• Добитник на наградата за 2023 година е САЊА СРБОВСКА д.м.и.

На свеченоста присуствуваа делегати на Собранието на Комората, Претседавачот Неџат Бајрами, Управниот одбор и други органи на Комората, Делегати од Собранието на РСМ, претставници на градежните компании, здруженија и организации, државни и образовни институции и семејствата на наградените инженери.

Извор: КОАИ