Архитектите разочарани од проектот за кровна градина над ГТЦ

Извори: Град Скопје, ГТЦ

Вчера во јавноста беше споделен проектот за зелениот кров над Градскиот Трговски Центар во Скопје. Од истиот момент, архитектонската фела на социјалните медиуми реагираше за истиот со доминантно негативни ставови. Архитектите претходно беа поделени и околу идејата за кровна градина над ГТЦ дали воопшто треба да се гради, но откако се обелодени избраниот дизајн се обединија дефинитивно против.

Сите прашуваа за презентираниот проект , како е добиен, кој е авторот и зошто воопшто не е организиран конкурс на оваа тема? Коментарите нема да ви ги пренесеме со цитати, поради несоодветниот јазик, но дефинитино упатуваа на разочарување од властите со голема доза на цинизам.

Она што обесхрабрува е дека насловот на идејата – зелен кров и јавен простор над ГТЦ не звучи лошо, но начинот на неговата реализација преку сиромашна 3Д презентација – фелата ја потсетува на не така далеку црните времиња на домашната архитектонска сцена. Ваков простор мора да биде предмет на јавен суд и професионална критика, а единствен соодветен начин за тоа да се добие е отворен и јавен двостепен конкурс на темата, со вистински стручно избрана комисија и јавна презентација на проектите влезени во вториот круг. Но и до тоа да се дојде потребни се големи дебати каква конкурсна задача треба да се подготви пред расписот на тој конкурс. Се поинаку мириса на нешто расипано.

Во продолжение официјалното известување од град Скопје:

„ГТЦ во Скопје ќе добие зелен покрив. Местото каде што ќе никне новата зелена површина денеска го посетија градоначалникот Петре Шилегов, Нарине Сахакјан, постојан претставник на Програмата за развој на Обединетите нации, Саша Богдановиќ, градоначалник на Општина Центар и Ѓоко Трајчевски, Директор на ГТЦ.

– ГТЦ е симбол на модерно, постземјотресно Скопје. Со проектот „Зелен покрив на ГТЦ“ финансиран од Град Скопје и имплементиран со поддршка на нашите пријатели од УНДП, постојниот покрив кој сега е речиси неискористен ќе стане атрактивен простор со зелена површина за одмор, рекреација и културно-забавен живот. Освен во урбаниот развој на градот,  овој проект ќе придонесе и за намалување на температурата во централното градско подрачје преку намалување на ефектот на урбаните топлински острови, подобрување на квалитетот на воздухот и управувањето со врнежите – рече денеска градоначалникот Шилегов.

Зазеленувањето на покривот на ГТЦ е дел од проектот со кој Програмата за развој на Обединетите нации (УНДП) ќе го поддржи Градот Скопје во спроведувањето на Стратегијата за климатски промени – Отпорно Скопје.

– Изградбата на зелениот покрив е една од многуте заеднички активности кои ги спроведуваат  Град Скопје и УНДП со цел да се зголеми отпорноста на градот и да се обезбеди одржливост преку воведување нови иновативни технологии и решенија – изјави постојаната претставничка на УНДП, Нарине Сахакјан.

На зелениот покрив со површина од 1.800 квадратни метри ќе бидат засадени 29 висококвалитетни дрвја и повеќе од 30 други видови садници. Ќе бидат поставени неколку водени зони во форма на фонтани и базени, монтажна бина, партерно шаховско поле, кафе-бар, како и модерна урбана опрема од клупи, корпи за отпадоци и паркинзи за велосипеди. Со зазеленувањето на покривот на ГТЦ, делумно ќе се надомести загубеното зеленило во Малиот ринг коешто до 2017 година претрпе загуби повеќе од 30% од вкупната површина на крошните на дрвјата кои беа засадени во овој дел на градот.

– Убеден сум дека со вакви конкретни чекори освен што ги враќаме посетителите во ГТЦ, полека го враќаме и модерниот сјај на Скопје со многу зелени површини и урбани содржини кои не носат чекор поблиску до целта Скопје конечно да стане зелена престолнина со која сите ќе се гордееме – нагласи градоначалникот Шилегов.

Автор на статија: