Retreat Villa / Студио Плато

16.01.2025 • XXI век

Автори: Тамара Стефаноска, Урош Николоски – Studio Plato
Локација: Остин, Тексас
Година: 2023
Бруто Површина: 321,64 m2

Вгнездена во грубиот пејсаж на Остин, Тексас, оваа вила за одмор е пример за совршена симбиоза помеѓу современата архитектура и недопрената природа. Основниот дизајн концепт се фокусира на создавање хармонична релација помеѓу изграденото и природното. Инспирацијата е црпена од специфичностите на тексашкиот пејзаж, со употреба на материјали кои истовремено го надополнуваат и контрастираат околниот контекст. Бетонот, како примарен материјал, со своите чисти линии и монолитна форма, обезбедува јасна геометриска структура која е во дијалог со органската дивина.

Чистите линии на волумените создаваат впечатлива силуета, која се истакнува наспроти позадината на грубата вегетација и карпите. Големите, внимателно позиционирани отвори на бетонската обвивка служат двојна цел: максимално навлегување на природна светлина во ентериерот и врамување на специфични погледи кон дивината. Овие елементи ја разбиваат границата помеѓу ентериерот и екстериерот, обезбедувајќи континуиран просторен дијалог помеѓу архитектурата и пејзажот.

Внатрешната просторна организација следи рационален распоред со концепт инспириран од форма на крст, што обезбедува јасна поделеност на функционалните зони. Трите пространи спални соби се дизајнирани со акцент на приватноста и комфорот, додека централната дневна зона, во која беспрекорно се спојуваат трпезаријата и просторите за престој, служи како социјален центар. Големата дневна соба, опремена со камин, претставува зона за собирање, која ги поттикнува интеракцијата и комфорот, особено во постудените месеци.

Архитектонскиот израз на вилата не е само одговор на природниот контекст, туку и негова интегрална компонента. Употребата на бетон со природни, земјени тонови овозможува структурата да се вклопи во пејзажот, додека големите стаклени отвори ја истакнуваат поврзаноста со екстериерот. Овој проект е пример за современа архитектура која ја нагласува одржливоста и сензитивноста кон природната средина, создавајќи простори кои овозможуваат целосно потопување во мирот и убавината на дивината.