МАРХ

Саат кула, Охрид / 1726г.

05.09.2024 • XVI - XIX век

Ктитор: Чавуш Дере Сулејман-ага

Година: изградба 1726, обнова 1979 год.

Локација: Охрид, месноста Дебој, Месокастро

Извори:  www.tvm.mk; www.mk.wikipedia.org;

Фотографии: МАРХ;

Саат кулата на Охрид е една од неговите помалку познатите знаменитости. Овој фрагмент од некогашниот отомански град, уште од 1726г. служи како градски саат.

Сместена на падините на брдото Дебој, кулата од една страна е опкружена со зеленило, а од друга со целосно современи градби. Таа се наоѓа непосредно до црквата Св. Богородица Каменско, и е лесно пристапна преку патот кој води до Горна Порта.

Кулата има едноставна камена структура, која нагоре се развива со дрвен завршеток, а во целост достигнува 12м. височина. Тука, во горниот дел се сместени часовникот и терасата со ѕвоно.

Во внатрешноста на објектот се наоѓа натписот на кој е забележано името на неговиот градител Чавуш Дере Сулејман-ага.

Бидејќи саат кулата се наоѓа надвор од градските ѕидини, и има четири пушкарници, можно е таа да имала и двојна улога како одбранбена кула.

Првобитно часовникот функционирал со систем на тегови, кој функционирал се до неговото растурање за време на Втората светска војна. По војната овој систем е заменет и не успешно модернизиран, бидејќи по обновата часовникот целосно престанува да функционира.

Повторното заживување на саат кулата е овозможено во 1960-те со донација од принцот на Кувајт кој го посетува Охридскиот маратон. Но на жалост, кратко потоа објектот го зафаќа пожар и повторно доживува штети и паѓа во заборав.

По збратимувањето на Охрид и Нови Сад во 1970-те, средства пристигнуваат од Војводина за обнова на кулата и набавување на нов систем за часовникот. Овој пат кулата добива електор механички саат од чешко производство, кој и до денес работи.

Иако часовникот е повторно функционален, кулата сепак е донекаде заборавена. Поради својата ниско фрекфентна локација, овој споменик никогаш не го добива вниманието кое го заслужува. Неговиот партер е исполнет со паркирани возила и обраснати треви, а пристапот внатре не е возможен.

Сепак кулата се уште силно стои, и таа има локален „чувар“ кој се грижи за одржување на часовникот и самиот објект. Дури и после три века оваа кула се уште го покажува точното време и не поврзува со историјата на овој дел на градот Охрид.