Сојуз на синдикати на Македонија, Скопје / 1962

12.08.2024 • ХХ век / II половина

Година: 1962

Автори: Славко Брезоски

Извори: „100 години Славко Брезоски“ ретроспективна изложба

Локација: Скопје

Архитект Славко Брезоски е претставник на повоената генерација македонски архитекти. Неговото авторско присуство е одбележано во знакот на модерната која ќе биде печат на македонската продукција во наредните неколку децении.

Зградите на Работничкиот дом и на Земјоделската банка на архитект Славко Брезоски (1922-2017), се исто така едни од првите значајни објекти на модерната што имаат свое посебно место во историјата на градот.

Локација на Сојузот на синдикати на Македонија во поширок контекст на центарот на град Скопје

Работничкиот дом (Домот на синдикатите на Македонија) е типичен експонат на просторната синтакса на слободностоечкиот објект. Вкупната стереометрија е организирана во асиметрична композиција од три тела, карактеристична за елементаристичкиот приод во организацијата на структурата, каде целината произлегува од реципрочниот однос на елементите (големата сала за собири не е реализирана).

Во oрганизација на основата е применета вообичаената административна шема на централно поставени комуникации и периметарски канцелариски трактови.

Слободната фасада, Брезоски ја варира низ различен обликовен третман, соодветен на нејзината позиција на објектот: високиот објект го одликува софистицираната едноставност на лентовидниот „административен“ дизајн, додека во делот на Работничкиот дом, јужната фасада од бетонски касети, кои ја зголемуваат нејзината длбочина и засенченост, се карактеризира со типична модерна пластичност.