ИНТЕРВЈУ СО БЕРКИН ИСЛАМ / ZAHA HADID ARCHITECTS – LONDON

23.05.2024 • Интервју

МАРХ: Најпрво ти благодариме Беркин што ја прифати поканата за ова интервју. Сакаме да ја запознаеме македонската јавност со твојот професионален пат. Но, најпрвин претстави ни се – Кој е Беркин?

БЕРКИН: Пред сѐ, Ви благодарам за поканата за интервјуто. Ми претставува задоволство да ги споделам моите искуства на вашата платформа, особено кога станува збор за трендовите во светската архитектура. Имам 31 година и роден сум во Скопје, живеам во Лондон веќе 13 години, а професијата ме носи низ различни места во светот.

МАРХ: Како започна твојот пат со архитектурата? Кога одлучи дека сакаш да бидеш архитект и каде заврши високо образование?

БЕРКИН: Уште од мала возраст имав голем интерес за архитектонските форми и геометрии. Доаѓам од креативно семејство каде што татко ми е архитект, мајка ми пијанист, а јас сум и обете. Решив да студирам архитектура не знаејќи колку долг пат ме очекува.

Со архитектонски студии започнав во 2011 на Architectural Association School of Architecture во Лондон каде што студирале архитектонски имиња како Рем Колхас, Ричард Роџерс, Бен Ван Беркел, Заха Хадид и многу други. АА или Архитектонска Асоцијација е еден од најконкурентите факултети во светот, специјализиран за архитектура и основан во 1847 година и чие мото Design with Beauty, Build in Truth ми стана предизвик и понатамошен принцип.

Одбрана и презентација на испитна задача РИБА дел 2

Студиите беа организирани во формат на РИБА Дел 1 и РИБА Дел 2, првиот дел беше Дипломски циклус, а вториот Магистерски. По дипломирањето, одлучив да направам една година пракса или Year Out во една од најголемите светски компании Perkins + Will – London, каде што имав можност да работам на проекти во Лондон, кои денес се изведени. Искуството во пракса беше одлучувачки момент во мојата кариера за тоа како да се ориентирам себеси во различните полиња во архитектурата, со продолжување со магистерски студии.

Магистерски труд Културен Центар

Имено, своите интереси ги пренасочив во дизајн, специјализиран во откривање на напредна геометрија, формирање на методологии за нејзина примена, како и иновативна градба и градежни материјали. Архитектурата ми прерасна во инструмент каде што преку дизајн можат да се истражуваат нови општествени норми и формирање на инклузивно и одржливо населување кое ги подобрува врските и односите меѓу корисниците и нивната околина. Потребите и предизвиците на современиот животот кој постојано флуктуира во технолошко стимулирани промени, активно се проучуваат преку дизајн на нови просторни решенија кои ја поттикнуваат соработката меѓу луѓето, објектите и природата. Секако, нови архетипови формираат и различни комуникациски канали каде што преку дизајнот се создаваат нови стимулации и интеракции.

МАРХ: Каков е текот на професионалниот пат по твоето магистрирање?

БЕРКИН: По завршувањето на магистерските студии, во 2018 се вработив во Zaha Hadid Architects, но паралелно продолжив со студиите за професионалните лиценци, односно РИБА Дел 3, и при успешните резултати се регистрирав со АРБ (Architects Register Board). Со тоа станав Chartered Architect, односно дел од РИБА – Ројал Институт на британски архитекти. Неодамна сум член и на Комората на овластени архитекти и инженери.

МАРХ: Студиото Заха Хадид претставува едно од најпознатите и најзвучни имиња во светот на архитектурата. Како започна твојата кариера таму и како се развиваше истата?

БЕРКИН: Како што веќе напоменав, во 2018 година се вработив во Заха Хадид Архитекти преку непосредно интервју со Патрик Шумахер, директорот на студиото и основоположник на параметричната архитектура. Започнувајќи во оваа конкурентна средина, бев подготвен да се справам со предизвиците. Мојот прв проект беше конкурс за амбасада и резиденции во Кина, а низ текот на годините имав можност да работам на 33 проекти, многу од нив веќе во изведба. Како дел од ЗХЦ кластерот, започнав со креативна работа на концепт проекти за меѓународни конкурси. Во овие конкурси нашата екипа се натпреварува со најпознатите светски фирми, како Фостер и Партнерс, БИГ, ОМА, МАД, Снохета, Хеатервик и други. Од самиот почеток, оваа поставка на фирмата каде што се ценеа иновативноста и науката во струката ми беше голем предизвик. Во првата година од работата успеав да победам на еден голем меѓународен конкурс за музеј, што ми донесе огромен напредок.

3D визуелизација / „Аустин Роад“ / 4 деловни кули во изведба во Хонг Конг

МАРХ: Како е организирано студиото на Заха Хадид?

БЕРКИН: Фирмата е базирана во Лондон со гранки во Хонг Конг, Пекинг, Њу Јорк, и неодамна Шензен. Студиото е организирано во таканаречени кластер групи кои водат различни проекти. Јас работам во ЗХЦ- Заха кластер, односно групата што ја водела самата Заха додека била жива. Нашиот кластер е мала група од талентирани колеги со кои заедно ги водиме сите нови проекти-конкурси и концепти, како и нивната понатамошна разработка и изведба. Често имаме состаноци каде што со другите членови на нашата група споделуваме инспирации и лични креативни интереси и дебатираме како можеме да ги вклучиме во проектите.

МАРХ: Која е твојата позиција во студиото?

БЕРКИН: Веќе 6 години сум во фирмата. При вработување како архитект низ годините бев унапреден во Сениор архитект, а неодамна имам улога на Водечки или Lead архитект. Во оваа позиција водам свој тим со кој имаме одговорност спрема нашите клиенти и непосредно сум инволвиран со водечкиот менаџмент на фирмата со кои заедно го раководиме дизајнот на проектите и испорака на истите.

МАРХ: Работиш на проекти од светско значење и видливост. Наброј десетина објекти кои сметаш дека во моментов ја одбележуваат твојата тековна кариера.

БЕРКИН: Во мојата кариера имам работено на над 40 проекти, а како член на ЗХА, на 33 проекти. Искрено, секој од нив има своја посебна важност, но посебно би ги издвоил следниве:

3D Визуелизација Zaha Hadid Architects

Првиот конкурс на кој победив беше Музејот на наука и технологија во Шензен, Кина. Објект од 100,000 м2 чија изведба е при крај и треба да се отвори за јавноста во декември 2024.
Јидан интернационалниот центар, кула од 300м висина каде што го водев победничкиот дизајн на конкурсот. Кулата се изведува моментално во Шензен, Кина.
Неодамна имав чест да го водам победничкиот дизајн на светски конкурс за Шаошинг Културен центар- театар, Концертни сали и Дигитален музеј во Кина. Комплекс од 80,000 м2 за кој почнуваме со основниот проект.

3D Визуелизација Zaha Hadid Architects

Аустин Роад е група од 4 деловни кули во изведба во Хонг Конг.
Станбени кули од 400 м висина и 7 ѕвезден хотел во Дубаи, УАЕ.
Стадион и спортски комплекс во Џинан, Кина.
Мастер план на нов град во околината на Шарџа, УАЕ, создаден да функционира на 100% одржлива енергија, на кој моментално работиме на основниот проект.