Пробивање на булевар АСНОМ и изградба на нов мост на Вардар

На 23ти март, градот Скопје излезе со соопштение на свиканиот прес, за отпочнување на постапката за изградба на коридор за поврзување на Аеродром, Гази Баба и Центар.  „Пробивањето на овој сообраќаен коридор ќе даде исклучителна развојна компонента на градот и истиот ќе овозможи да патуваме побрзо и побезбедно. Од Ново Лисиче до Саем или од Автокоманда до ТЦ Бисер со автомобил ќе се стигнува за само 5 минути. Времето на движење за велосипедистите и пешаците, исто така, ќе биде драстично намалено“ – рече Шилегов.

Новиот проект освен нов мост преку Вардар во должина од 120 метри предвидува и пробивање на нов и реконструкција на стар булевар во вкупна должина од 2170 метри, 5 вкрстувања, 6 коловозни ленти, велосипедски патеки во двете насоки, пешачки патеки и дрвореди. Новиот коридор во градот задолжително ќе биде проследен и со нови автобуски линии на јавниот градски превоз.

Проектот којшто беше презентиран денеска е предвиден во ГУП од 1965-та година, а досега за него никој во Градот ја немаше изготвено основната планска документација. Градбата на овој коридор со мост предвидено е да биде завршен во рок не подолг од 24 месеци од почетокот на градежните работи.

Во јавноста за жал „современото хејтерство“  веднаш го нападна проектот кој е планиран повеќе од 50 години како дел од основната сообраќајна мрежа, со лесно нафрлање на зборови – екологија, загадување, уништување историја, повеќе сообраќај. Проблемот на Скопје со загадувањето е сериозна работа и бара целосна стратегија, но утопиското размислување дека во Скопје повеќе нема да постојат возила и дека сообраќајната мрежа треба да се доведе до колапс во најмала рака е незрело и површно размислување.