МАРХ

Тениска арена, гимнастичка сала и сала за боречки спортови

15.09.2016 • XXI век Информации

Директорот на СЦ „Борис Трајковски“ Златко Перински денеска ја презентираше новата капитална инвестиција за изградба на нова тениска арена, гимнастичка сала и сала за боречки спортови.

Новата сала ќе биде лоцирана во делот на Спортскиот центар и е прва од ваков тип во нашата држава, а единствена во регионот која ги опфаќа овие три содржини.

– Денеска го презентираме проектот кој го најавивме пред одредено време за изградба на тениска арена и гимнастичка сала, а на мое големо задоволство можам да соопштам дека овој проект го надополнуваме со сала за боречки спортови. Објектот ќе овозможи одржување на професионални натпревари од тенис, гимнастика и боречки спортови, а кога сме кај гимнастиката, можам да кажам дека повеќе од 30 години не е ништо изградено за овој спорт, рече Перински на презентацијата на проектот.

Тој информира за содржините на новиот објект кој ќе биде дел од центарот.

– Салата ќе биде на две нивоа, на првото на 3.159 вкупна површина ќе се наоѓаат реквизитите и борилиштата за карате, бокс и кик-бокс, помошни простории, гардероби, тоалети, и остави за потребите на клубовите. Предвидено е да се постават два душека за борачите, четири татами за каратистите и пет ринга за боксерите. Дополнително, предвиден е и простор за трим патека и простор за фитнес центар, изјави директорот на СЦ „Борис Трајковски“.

Извор: СЦ „Борис Трајковски“