МАРХ

Станбен блок (П+4+Пк.) Автокоманда

27.04.2026 • Фотографија ХХ век / II половина

Објект:  Станбен блок (П+4)

Автори: Т. Василев, Д. Шуловиќ

Година на проектирање:  1968

Локација: ул. ,,Ташко Караџа” , населба Автокоманда, Скопје

Фотографија: Борис Јурмовски, 2026

Станбениот блок со катност П+4+Пк во населбата Автокоманда е дел од урбанистичко решение за населбата, кое опфаќа шест станбени кули и седум станбени блокови.

(Брошурата со урбанистичкото решение за населбата Автокоманда е достапна за преземање на следниот линк >>>  Автокоманда – Станбени кули и блокови <<<)

Тој претставуваат јасен и успешен пример за внимателно проектирање, каде што посебно се води грижа за правилната ориентација, природното осветлување и функционалната поврзаност на просториите. Архитектонски е обликуван ненаметливо, но со внимателно вклучени елементи како постепено спуштање кон гаражниот простор и мостови што водат до влезовите, со природно осветлен скалишен простор. На тој начин се создаваат пријатни и нови просторни доживувања.

Објектот е поставен во насока север–југ. Дневната соба и трпезаријата се ориентирани кон запад, додека спалните соби кон исток. Внатрешната организација овозможува кружно движење помеѓу дневната соба, трпезаријата и кујната. Од дневната соба се излегува на тераса, а од трпезаријата на економска лоѓа.

Гаражниот простор е решен во рамки на самиот објект, а секој стан има и сопствен подрумски бокс. Во поткровјето се предвидени атељеа, замислени како мали станови со една поголема просторија, ориентирана кон север.

Во поширок контекст, ваквите објекти отвораат и значајно прашање за одржувањето на постојниот станбен фонд во Македонија. Иако овие згради се проектирани со висок степен на функционалност и квалитет, со текот на времето нивната состојба често се влошува поради недоволно и несистематско одржување. Затоа, неопходно е да се воспостави континуиран и институционално поддржан пристап кон нивната санација, енергетска ефикасност и зачувување на архитектонските вредности, со цел да се продолжи нивниот животен век и да се задржи квалитетот на живеење.