Комеморативна седница во чест на архитект Славко Брезоски

11.03.2017 • Информации

Вчера, 10.03.2017 во амфитеатарот при АФС се одржа комеморативна седница во чест на големото име на македонската архитектонска сцена, Славко Брезоски.

Седницата ја водеше професор Анета Христова, а свои говори одржаа и Минас Бакалчев, Мартин Гулевски, Михајло Волканов и Митко Хаџи Пуља. На комеморацијата беа присутни професори, постари колеги, членови на семејството, студенти…

Се говореше со голема почит кон наследството кое го остави Брезовски, не само како градител туку и како професор, пријател, човек.

Деканот Минас Бакалчев се осврна на реализирањето на амбасадата на Југославија во Бразилија, нејзината вредност и личен дострел на архитектот, додека говорот на Волканов не приближи кон случките низ процесот на соработка и другарување, во кои поентираше со истакнување на скромноста на Брезоски како личност.

Професорката Христова сподели импресии за неговата професорска димензија и вредноста како автор со став и личен потпис во архитектурата, неговата непокорност кон принципите на модерната и цврсто држење во тоа до својата 95 годишна возраст и покрај деградирањето на неговите дела.

Професорот Гулевски низ емотивниот говор се поздрави со својот колега споделувајќи повеќе заеднички искуства и хронолошки информации, додека Хаџи Пуља ја заокружи седницата со духовната димензија на неговото дело Соборниот храм „Св.Климент Охридски“ во Скопје.